नेपाली काङ्ग्रेस सच्चिएर अगाडि बढे ९० प्रतिशत भोट ल्याउछ-बरिस्ठ नेता पौडेल

कञ्चन आवाज
२४ माघ २०७७

नेपाली कांग्रेसका वरिष्ठ नेता रामचन्द्र पौडेलले कांग्रेस सच्चिएर अघि बढ्नुपर्ने समय आएको बताएका छन् ।

नेपाली कांग्रेसको शुभेच्छुक संस्थाले तनहुँको दमौलीमा शनिवार सयुक्त रूपमा आयोजना गरेको विरोध सभालाई सम्बोधन गर्दै उनले भने, ‘कांग्रेसको इतिहास राम्रो छ, नेताहरू सच्चिएर अघि बढ्ने हो भने ९० प्रतिशत भोट कांग्रेसलाई आउँछ ।’

वरिष्ठ नेता पौडेलले जनताको समस्या समाधान गर्ने गरी कांग्रेस अघि बढ्नुपर्ने बताउँदै पार्टीभित्र एक पक्ष कमजोर अर्को पक्ष बलियो हुन्छु भन्ने सोचाई राख्नु गलत भएको धारणा व्यक्त गरे ।

‘कम्युनिस्ट पार्टीहरुबीच फुट हुँदा कांग्रेस बलियो वा खुशी हुन्छ भन्ने होइन,’ उनले भने, ‘अर्काको भत्किएर आफ्नो घर बलियो हुन्छ भन्ने सोचाई कसैले राख्नु हुँदैन ।’

वरिष्ठ नेता पौडेलले विघटित प्रतिनिधिसभा अदालतबाट पुनःस्थापना नभए आन्दोलनबाट हुने बताउँदै प्रतिनिधि सभाको पुनःस्थापना अदालतबाटै हुने आफू विश्वस्त रहेको उल्लेख गरे । ‘प्रतिनिधिसभा विघटन हुनु भनेको लोकतान्त्रिक व्यवस्था संकटमा पर्नु हो,’ उनले भने, ‘वैशाखमा चुनाव हुने अवस्था छैन ।’

सिद्धान्तमा एक भएर पार्टी एकीकरण नभई पद र सत्ता प्राप्तिका लागि गरिएकाले कम्युनिस्ट पार्टी फुटको अवस्था आएको उनको भनाइ छ ।

नेपाली कांग्रेसका केन्द्रीय सदस्य गोविन्द भट्टराईले कांग्रेस चुनावदेखि डराउने पार्टी हैन भन्दै चुनाव र संसद् पुनःस्थापना पनि नहुने अवस्था आएमा आन्दोलन मात्र एक विकल्प भएको बताए।रासस

Leave a Reply

Your email address will not be published. Required fields are marked *

Back to top button