नेकपाको साधारण सदस्य बाट ओलिलाइ पाखा लगाएरै छाड्ने प्रचण्ड माधब समुहको निर्णय

कञ्चन आवाज
११ पौष २०७७

अध्यक्षद्वय पुष्पकमल दाहाल ‘प्रचण्ड’ र माधवकुमार नेपाल नेतृत्वको नेपाल कम्युनिस्ट पार्टी (नेकपा) ले प्रधानमन्त्री एवं नेकपा अध्यक्ष केपी शर्मा ओलीलाई पार्टी सदस्यबाट पनि निष्कासन गरेको छ ।

प्रचण्ड–नेपाल समूहले पुस ७ गते ओलीलाई नेकपा अध्यक्षबाट हटाउने निर्णय गरेको थियो ।

पार्टी केन्द्रीय कार्यालय कोटेश्वरमा आइतवार बसेको प्रचण्ड–नेपाल समूहको स्थायी कमिटी बैठकले ओलीलाई पार्टी सदस्यबाट समेत निष्कासन गर्ने निर्णय गरेको स्थायी कमिटी सदस्य गणेश साहले जानकारी दिए ।

पार्टी हित विपरीतको काम गरेको तथा प्रतिनिधिसभा विघटन गरेकाले ओलीलाई अनुशासनको कारवाही गरिएको प्रचण्ड–नेपाल समूहले दावी गरेको छ ।

यसअघि प्रचण्ड–नेपाल समूहले पार्टी महासचिव विष्णु पौडेललाई समेत कारवाही गर्ने निर्णय गरेको थियो ।

पार्टी हित विपरीतको काम गरेको भन्दै नेकपाको ओली समूहले प्रचण्डलाई दिइएको कार्यकारी अधिकार खोसेको थियो । ओली समूहले भने नारायणकाजी श्रेष्ठलाई दिएको प्रवक्ताको जिम्मेवारी खोसे पनि प्रचण्डलाई कारवाही गरेको छैन ।

पुस ५ गते प्रतिनिधिसभा विघटनपछि प्रचण्ड–नेपाल समूहले ओलीसँग स्पष्टीकरण मागेसँगै नेकपा विभाजनको प्रक्रिया शुरू भएको थियो । आधिकारिकता दाबी गर्दै दुवै पक्ष निर्वाचन आयोग पुगे पनि आयोगले कुनै निर्णय गरेको छैन ।

Leave a Reply

Your email address will not be published. Required fields are marked *

Back to top button