पञ्चदेवल विनायकमा ४ सय १८ ले रोजगारी पाउँदै, २३ आयोजना छनोट

  • कन्चन आवाज
  • २१ पौष २०७७

अछाम – प्रधानमन्त्री रोजगार कार्यक्रम अन्तर्गत पञ्चदेवल विनायक नगरपालिकामा यस बर्ष ४ सय १८ जनाले रोजगारी पाउने भएका छन् । सोमबार बसेको नगर कार्यपालिकाको बैठकले विभिन्न २३ वटा सामुदायिक आयोजना छनोट गरी रोजगार कार्यक्रम सञ्चालन गर्ने निर्णय गरेको हो ।

यस बर्ष प्रधानमन्त्री रोजगार कार्यक्रमका लागि प्राप्त सशर्त बजेट २ करोड १६ लाखबाट नगरका सबै वडामा सामुदायिक आयोजना सञ्चालन गरिने बताइएको छ । सोमबारको बैठकले सडक मर्मत, सिँचाइ कुलो निर्माण, विद्यालय घेरापर्खाल निर्माण, गोरेटो बाटो मर्मत, तटबन्ध, खानेपानी मर्मत सम्भार लगायतका आयोजना छनोट गरेको छ ।

रोजगार सेवा केन्द्रमा सूचीकृत भएका बेरोजगार व्यक्तिहरुमध्ये प्राथमिकीकरणमा परेका व्यक्तिहरुले आफ्नो नजिकको आयोजनामा काम गर्ने व्यवस्था मिलाइएको रोजगार संयोजक भरतराज अधिकारीले बताउनुभयो । उहाँका अनुसार यस बर्ष पञ्चदेवल विनायक नगरपालिकामा १८ सय व्यक्ति बेरोजगार सूचीमा सूचीकृत भएका छन् ।

जसमध्ये ३ सय १८ जना कामका लागि पारिश्रमिकमा आधारित सामुदायिक आयोजनामा संलग्न हुनेछन् भने १ सय जना युवा रोजगारीका लागि रुपान्तरण पहल आयोजनामा संलग्न रहनेछन् । रोजगारीमा संलग्न हुने सबैलाई पूरै १ सय दिन काम दिइने र प्रतिदिनको ज्याला ५ सय १७ रुपैया रहने छ ।

प्रधानमन्त्री रोजगार कार्यक्रमले यसबर्षदेखि १ सय दिनेे रोजगारीमा संलग्न हुने श्रमिकका लागि बीमाको समेत व्यवस्था गरेको हुँदा श्रमिकको सुरक्षामा विशेष ध्यान दिइएको उहाँले बताउनुभयो ।

Leave a Reply

Your email address will not be published. Required fields are marked *

Back to top button