नेकपा सचिबालयको बैठक मा दुबै अध्यक्षको प्रस्ताब माथी छलफल जारी-कन्चन आवाज

  • कन्चन आवाज
  • २०७७ मङ्सिर १६ गते,रोज ०३

 

पार्टीको विवाद जटिल मोडमा पुगेको बेला सत्तारुढ नेपाल कम्युनिस्ट पार्टी (नेकपा) सचिवालयको बैठक बालुवाटारमा बसिरहेको छ ।

प्रधानमन्त्री निवास बालुवाटारमा दिउँसो साढे १ बजेदेखि बैठक चलिरहेको छ ।

औपचारिक ढंगले बैठक शुरू हुनुअघि बालुवाटारमा केक काटेर पार्टी महासचिव विष्णु पौडेलको जन्मदिन मनाइएको थियो ।

बैठकमा प्रधानमन्त्री एवं अध्यक्ष केपी शर्मा ओलीले कार्यकारी अध्यक्ष पुष्पकमल दाहाल ‘प्रचण्ड’का आरोप खण्डन गर्दै जवाफी प्रतिवेदन पेश गरेपछिको अवस्थाबारे छलफल भइरहेको छ ।

गत कात्तिक २८ गते बसेको सचिवालय बैठकमा प्रचण्डले ओलीमाथि गम्भीर आरोप लगाउँदै सचिवालयमा एउटा दस्तावेज पेश गरेका थिए ।

मंसिर १३ गतेको बैठकमा ओलीले ५३ बुँदे जवाफ सहितको प्रतिवेदन पेश गरेका थिए । शनिवारको बैठकमा प्रचण्डले ओलीको दस्तावेज दम्भले भरिएको पोको भएको प्रारम्भिक टिप्पणी गरेका थिए । ओलीले प्रतिवेदनमा लगाएको आरोपबारे मंगलवार प्रचण्डले जवाफ दिने तयारीसहित बालुवाटार गएका थिए ।

ओली र प्रचण्ड दुवै प्रस्तावमाथि छलफल गरेर स्थायी कमिटी र केन्द्रीय कमिटी बैठकमा लैजानुपर्ने प्रचण्ड र माधव नेपाल समूहको माग छ । ओली पक्षले भने प्रचण्डको प्रस्ताव फिर्ता हुनुपर्ने अडान लिएको छ । ओलीले प्रचण्डको प्रस्ताव सचिवालयले खारेज गरेर भदौ १६ गतेको सहमतिमा फर्किनुपर्ने लिखित प्रतिवेदनमा उल्लेख गरेका छन् ।

नेकपा स्थायी कमिटी बैठक मंसिर १८ र केन्द्रीय कमिटी बैठक मंसिर २५ गतेदेखि काठमाडौंमा हुँदैछ । सचिवालय बैठक धुम्बाराहीमा तय भए पनि अन्तिम समयमा बालुवाटारमै सारिएको थियो ।

Leave a Reply

Your email address will not be published. Required fields are marked *

Back to top button